नेताद्वय पाण्डे र भुषाललाई पार्टीबाट छ महिना निलम्बन गर्ने एमालेको निर्णय

काठमाडौं । सत्तारुढ दल नेपाल कम्युनिष्ट पार्टी (एमाले) ले थप दुई नेतालाई छ महिनाका लागि निलम्बन गर्ने निर्णय गरेको छ । नेता सुरेन्द्र पाण्डे तथा घनश्याम भुषाललाई निलम्बन गर्ने निर्णय भएको प्रधानमन्त्रीका प्रेस सल्लाहकार सूर्य थापाले जानकारी दिनुभयो ।
यसअघि एमालेले नेताहरु माधवकुमार नेपाल र भीमबहादुर रावललाई निलम्बन गर्ने निर्णय गरेको थियो । नेताद्वय पाण्डे र भुषालले पार्टीले सोधेको स्पष्टीकरणको जवाफ ढिला दिनुभएको र स्पष्टीकरणको जवाफ चित्तबुझ्दो नभएपछि निलम्बनको निर्णय भएको उहाँले जानकारी दिनुभएको छ ।
पहिलो पटकको स्पष्टीकरणको जवाफ नदिएपछि नेता पाण्डे र भुषाललाई १६ गते पुनः अर्को स्पष्टीकरण सोधिएको हो । पार्टी एकतालाई विखण्डन गर्ने, पार्टी फुटाउने, पार्टीभित्रको सहकार्यलाई क्षतविक्षत गर्ने, अवैधानिक गुटगत भेला गर्दै हिँडेको आरोप दुवै नेतालाई लागेको छ । स्पष्टीकरणमा सोधिएअनुसार आफ्नो त्रुटी र भूल स्वीकार नगरिएको निलम्बन पत्रमा उल्लेख गरिएको छ ।
नेता भुषाललाई निलम्बन गर्ने पत्रमा भनिएको छ, “आपराधिक क्रियाकलापहरु स्वीकार्ने, भूल सुधार गर्ने, पार्टी एकता तथा पार्टीको निरन्तर विकास र उन्नतिका लागि पार्टीमा समाहित हुने साथै विगतमा भए गरिएका गलत तथा आपराधिक क्रियाकलापहरुप्रति प्रायश्चित गर्ने अवसरलाई गम्भीरताका साथ लिनुको साटो उल्टै स्पष्टीकरण सोध्नेजस्तो अनाधिकृत र हाँस्यास्पद कार्य गरेको देखियो ।