महोत्तरी । मंगलबार बिहान एकसाथ खेततिर घाँस काट्न गएका महोत्तरीको भंगहा नगरपालिका वडा नं. ८ धरमपुरका ५ बालिका र २ किशोरी बेपत्ता भएका छन् । बेपत्ता हुनेहरुमा ११ वर्षीया अर्चना पासवान, १२ वर्षीया सीमा पासवान, १२ वर्षीया रञ्जना पासवान, १३ वर्षीया ज्योती पासवान, १३ वर्षीया रिया पासवान, १७ वर्षीया नगीना पासवान र २० वर्षीया अस्मिता पासवान रहेका छन् ।
मंगलबार साँझदेखि नै स्थानीय प्रतिनिधिसहितको टोली खोजी कार्यमा लागे पनि फेला पार्न नसकिएको भंगाहा नगरपालिकाका नगरप्रमुख सञ्जीव कुमार साहले बताउनुभयो ।
जिल्ला प्रहरी कार्यालय महोत्तरीका एसपी दिनेश आचार्यले युवतीहरूको खोजी भइरहेको जानकारी दिनुभयो ।
काट्न गएका १० देखि १८ वर्षसम्मका सात बालिका र किशोरी अपहरणमा परेको हुनसक्ने अनुमान प्रहरीले गरेको छ । सम्पर्कविहीन सातै जनाको खोजी नेपाल प्रहरी, सशस्त्र प्रहरी र आफन्तले गरिरहेका छन् । अहिलेसम्म कुनै सुराकी पाउन नसकिएकाले उनीहरु ललाइफकाइमा परेर अपहरणकारीको कब्जामा परेको हुनसक्ने अनुमान प्रहरीले गरेको छ । सम्पर्कविहीनको खोजीमा ठाउँ–ठाउँमा प्रहरी परिचालित गरिएको जिल्ला प्रहरी कार्यालय महोत्तरीका प्रमुख तथा प्रहरी उपरीक्षक दिनेश आचार्यले जानकारी दिनुभयो ।
एकै पटक ७ जना बालबालिका तथा किशोरी बेपत्ता भएपछि गाउँमा त्रास उत्पन्न भएको छ ।
