सर्वोच्चमा विचाराधीन मुद्दामाथि सडकबाट फैसला गर्न खोज्नु गलत : कांग्रेस नेता भण्डारी

रुपन्देही । नेपाली कांग्रेसका केन्द्रीय सदस्य डा. चन्द्र भण्डारीले संविधानको अन्तिम व्याख्या गर्ने अधिकार सर्वोच्च अदालतलाई मात्रै रहेको बताएका छन् ।
प्रतिनिधिसभा विघटनबारेको मुद्दा सर्वोच्च अदालतमा विचाराधीन अवस्थामा छ । सो मुद्दाबारे सर्वोच्च अदालतका चार जना पूर्वप्रधानन्यायधीश, नागरिक समाजका अगुवा र केही नेताहरुले दिइरहेको अभिव्यक्तिप्रति इंगि गर्दै सर्वोच्च अदालतमा रहेको विचाराधीन मुद्दामाथि सडकबाट फैसला गर्न नहुने बताए । उनले संसद् पुनःस्थापना हुने÷नहुने विषयमा सर्वोच्च अदालतले गरेको निर्णयलाई नै सबैले आत्मसाथ गर्नुपर्ने बताए । उनले भने, ‘सर्वोच्चले जे व्याख्या गर्छ, त्यसलाई सबैले स्वीकार गर्नुपर्छ।’
रिपोर्टर्स क्लब नेपाल लुम्बिनी प्रदेशले आज बुटवलमा आयोजना गरेको साक्षात्कारमा कार्यक्रममा नेता भण्डारीले सर्वोच्चमा विचाराधीन रहेको विषयमा पूर्वप्रधानन्याधीशले बोल्नु पनि गलत भएको टिप्पणी गरे।
विधिको शासन र व्यवस्थाप्रति विश्वास गर्नेले नै संसद् विघटनका बारेमा सर्वोच्चमा विचाराधीन अवस्थामा रहेका विषयमा बोल्नु गलत भएको उनको भनाइ छ। रासस