बुटवलमा गोली चल्दा एकजना घाइते

बुटवल । मिलनचोकस्थित एक होटेलमा गोली लागेर एक जना घाइते भएका छन् । बुटवल उपमहानगरपालिका वडा नं ८ सुख्खानगरस्थित कलश होटलमा गोली चलेको थियो । होटलमा बसेका चार जनामध्ये काठमाडौं महानगरपालिका ठेगाना भएका राकेश न्यौपानेलाई गोली लागेको बताइएको छ । उनलाई उपचारर्थ लुम्बिनी प्रादेशिक अस्पताल भर्ना गरिएको बताइएको छ ।
‘उक्त होटेलमा गैंडाको खाग तस्करीमा संलग्न व्यक्तिहरु बसेको सूचनाका आधारमा आज बिहान ९ बजेतिर सादा पोशाकका दुईजना प्रहरी रेकी गर्न गएका थिए ।’ रुपन्देही प्रहरीका प्रवक्ता सत्यनारायण थापाले भने ‘प्रहरीले चार जना बसेको कोठामा चुकुल लगाइदिएर थप प्रहरी बल बोलाएको थियो । त्यसपछि कोठामा बसेकाहरुले ढोका फोडेर प्रहरीको पेस्तोल खोसेर गोली चलाए । सोही क्रममा न्यौपाने घाइते भएका हुन ।’
होटेलबाट लेकबेंसी नगरपालिका सुर्खेतका भक्तबहादुर थापा र जाजरकोट बारेकोट गाउँपालिका ७ का कर्णबहादुर राउतलाई प्रहरीले नियन्त्रणमा लिएर अनुसन्धान थालेको बताइएको छ ।
उनीहरुको साथबाट एउटा खागसमेत बरामद भएको र एक विरेन्द्रबहादुर सिंह भने भाग्न सफल भएको प्रहरीले जनाएको छ ।