गुल्मीमा जिप दुर्घटनामा मृतकको संख्या ६ पुग्यो

गुल्मी । गुल्मीमा भएको जिप दुर्घटनामा मृतकको संख्या ६ पुगेको छ । चालकसहित ९ जना सवार जिप आज विहान सडकबाट करिब ४ सय मिटर तल खसेको थियो ।
इस्मा गाउँपालिकाबाट तम्घास आउँदै गरेको लु१ज ११६६ नम्बरको जिप इस्मा गाउँपालिका– ४ को हुलमा दुर्घटना भएको थियो ।
दुर्घटनामा परेका ५ जनाको घटनास्थलमै र एकजनाको गुल्मी अस्पतालमा उपचारको क्रममा मृत्यु भएको जिल्ला प्रहरी कार्यालय गुल्मीले जनाएको छ ।
प्रहरीका अनुसार मृत्यु हुनेहरु इस्मा गाउँपालिका–४ हुलका ६५ वर्षीय डम्बर हितान, ३३ वर्षका शिव दर्लामी, ३० वर्षीय वसन्त दर्लामी, ३३ वर्षीय धनबहादुर अछामी र मालिका गाउँपालिका–५ का ८० वर्षीय थापा र गुल्मी अस्पतालमा उपचाररत १९ वर्षीय फर्सुराम थापा रहेका छन् ।
इस्मा गाउँपालिका–४ हुलकै २८ वर्षीया सरस्वती दर्लामी र सहचाक २५ वर्षका कमल हितान घाइते भएको बताइएको छ । उनीहरुको गुल्मी अस्पताल उपचार भइरहेको बताइएको छ । चालक वुद्ध बस्नेत भने सकुसल रहेको प्रहरीले जनाएको छ ।