गस्ती गएका असईको शव नदीमा भेटियो, जवान बेपत्ता

काठमाडौं । कैलालीमा गस्तीमा गएका एक प्रहरीको शव नदीमा फेला परेको छ भने अझै एक जना वेपत्ता छन् । शनिबार राति मोटरसाइकलमा गस्ती गएका असई र जवानमध्ये असई मृत भेटिएको प्रदेश प्रहरी कार्यालयले जनाएको छ।
अस्थायी प्रहरी पोस्ट जुगेडाबाट गस्तीमा गएको टोली सम्पर्कमा नआएपछि खोजतलास सुरु भएको थियो । विहान स्थानीयले नदीको बीचमा शव देखेपछि प्रहरीलाई खबर गरेका थिए।
असई गोविन्द विकको हत्याको आशंकामा प्रहरीले ११ जना शंकास्पद व्यक्तिलाई पक्राउ गरेको बताइएको छ । पक्राउ पर्नेमा त्यस क्षेत्रबाट सामान तस्करीमा संलग्न रहने गरेका व्यक्ति र विकसँग असन्तुष्ट समूहका सदस्यहरु रहेको बताइएको छ । अनुसन्धान प्रारम्भिक चरणमा रहेकाले पक्राउ पर्नेको नाम खुलाइएको छैन ।
मृतक विकको शव पनि निकालिएको छ, धारिलो हतियार प्रहार गरेर हत्या भएको हुनसक्ने देखिएको प्रहरीले जनाएको छ । विस्तृतमा पोष्टमार्टम रिपोर्ट आएपछि मात्रै खुल्ने प्रहरीले जनाएको छ ।
विकसँगै शनिबार साँझ बा ५८ प ५२८४ नम्बरको मोटरसाइकलमा गस्तीका लागि निस्किएका प्रहरी रामबहादुर साउद अझै वेपत्ता छन् । नदीमा खोजीका लागि सशस्त्र प्रहरी बलको गोताखोर टोली र नेपाल प्रहरीको टोली खटाइएको बताइएको छ ।