बाँके । भेरी अस्पतालमा सेवा लिन आउने अधिकांश बिरामी अस्पतालको सेवासुविधा, चिकित्सकको व्यवहार र सरसफाइप्रति सन्तुष्ट देखिएका छैनन् । लुम्बिनी प्रदेशको एकमात्र सङ्घीय अस्पतालको सेवाबाट सन्तुष्ट हुनेभन्दा असन्तुष्ट हुनेको सङ्ख्या दिनप्रतिदिन बढ्दै गएको जनाइएकोछ ।
दैनिक एक हजारको हाराहारीमा बिरामी सेवा लिन अस्पताल आउने गरेको अस्पतालले जनाएको छ । सेवा लिन भेटिएका अधिकांश बिरामी र उहाँका आफन्तले अस्पतालको उपचार सेवा, चिकित्सकको व्यवहार राम्रो नभएको गुनासो गरेका छन् । बिरामीले प्रश्न गर्दा चिकित्सक र नर्सले उत्तर दिन झर्को मान्ने गुनासो अस्पतालमा सुनिदै आइएको छ । अस्पतालद्वारा सञ्चालित औषधि पसलमा बिरामीले चोहेका औषधि पाइँदैन । यसैगरी प्रयोगशाला परीक्षण गर्न निजी प्रयोगशाला जानुपर्ने बाध्यता बिरामीमा रहेको छ ।
शौचालयको दुर्गन्धले अस्पतालमा बसिसक्नु छैन । अस्पतालका मेडिकल सुपेरिटेण्डेण्ट डा रुपानन्द अधिकारीले भन्नुभयो, “अस्पतालको सेवा प्रभावकारी बनाउन कर्मचारीको अनुशासन, सरसफाइ र व्यवहारमा विशेष ध्यान दिइएको छ ।” अस्पतालमा प्रायः सबै रोगका विशेषज्ञ चिकित्सक कार्यरत रहेका छन् । चिकित्सकले अस्पतालमा भन्दा बाहिरका निजी क्लिनिकमा बढी समय दिँदै आएका छन् । अस्पतालमा कार्यरत चिकित्सकले बिरामी भएको श्ययामा नपुगेरै ढोका बाहिरैबाट अवलोकन (राउण्ड) गर्ने गरेको बिरामीको गुनासो छ ।
सिकलसेलका बिरामी समस्यामा
अस्पतालमा रहेको सिकलसेल एनिमिया जाँच गराउने मेशिन बिग्रिएपछि यसका बिरामीले १० महिनादेखि जाँच गराउन पाएका छैनन् । अहिले निजी क्लिनकमा जाँच गराउन बाध्य रहेका छन् ।
अस्पतालका मेसु डा अधिकारी र सम्बन्धित रोगका विशेषज्ञ डा राजन पाण्डेले अहिलेसम्म मेशिन मर्मत गर्नेतर्फ चासो नदेखाएका बिरामीको गुनासो छ । मेशिन बिग्रिएपछि निःशुल्क उपचार सेवाबाट पनि बिरामी वञ्चित भएका छन् । इलेक्ट्रोफोरसिस मेशिन बिग्रिएपछि बिरामी चर्को शुल्क तिरेर बाहिर जाँच गराउन बाध्य भएका छन् ।
रु एक हजार ५०० देखि रु दुई हजारसम्म शुल्क तिरेर जाँच गराउन बाध्य भएको सिकलसेल एनिमिया सोसाइटीका अध्यक्ष प्रभुराम थारुले बताउनुभयो । मेशिन बिग्रिएकाले निःशुल्क सेवाबाट बिरामी वञ्चित भएका छन् । आर्थिक अवस्था कमजोर भएका बिरामी उपचारबाट वञ्चित हुनुपरेको अध्यक्ष थारुको भनाइ छ । अस्पतालमा हप्तामा ६०–७० जना सिकलसेल जाँचका लागि आउने गरेका छन् ।
सिकलसेलका बिरामीले आठ महिनादेखि चर्को शुल्क तिरेर निजी क्लिनिकमा जाँच गराउन बाध्य भएको चिकित्सक नै बताउँछन् । अस्पतालमा दुई वटा इलेक्ट्रोफोरसिस मेशिन छ । जिल्ला जनस्वास्थ्य कार्यालय बाँकेले दिएको मेशिन प्रयोगमा नआउँदै थन्किएको छ । स्वास्थ्य विभागले दिएको मेशिन बिग्रिएर थन्किएको छ । स्वास्थ्य सेवा विभागले दिएको मेशिन मर्मत गर्न दिए पनि अहिलेसम्म मर्मत हुन नसकेको अस्पतालका मेसु डा अधिकारीको भनाइ छ । रासस
