सेन्ट्रल जोन खेल्ने नेपाली महिला भलिबल टोली बङ्गलादेशमा

काठमाडौँ । बङ्गलादेशमा आयोजित पहिलो संस्करणको एशियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिप खेल्न नेपाली राष्ट्रिय महिला भलिबल टोलीलाई त्यहाँ पुगेका छन् । कात्तिक २१ देखि २९ गतेसम्म ढाकामा आयोजित उक्त प्रतियोगितामा सहभागिता जनाउन गएको टिमलाई नेपाल भलिबल सङ्घका अध्यक्ष मनोरञ्जन रमन शर्मा, महासचिव जीतेन्द्रबहादुर चन्द, उपाध्यक्ष रञ्जन खड्कालगायतले सफलताको शुभकामना दिँदै बिदाइ गरेका थिए ।
नेपाली खेलाडीमा कप्तान अरुण शाहीसहित प्रतिभा माली, सरस्वती चौधरी, निरुता ठगुन्ना, जानकी भण्डारी, सोफिया पुन, उषा विष्ट, सुनिता खड्का, कमला पुन, रेश्मा भण्डारी, पुनम चन्द र सलिना श्रेष्ठ छन् । प्रतियोगितामा आयोजक बङ्गलादेशसहित नेपाल, अफगानिस्तान, किर्गीस्तान, माल्दिभ्स र तुर्कमेनिस्तान सहभागी छन् । नेपालमा आयोजना हुने १३औँ दक्षिण एशियाली खेलकूद (साग) र एभिसी सेन्ट्रल जोनको तयारीका लागि नेपाली टोलीले थाइल्याण्डमा १९ दिन प्रशिक्षण गरेका थिए ।